اضحك الصورة أصبحت ألوان
لما العمر يتكوم على ناصية حنين
لما تهرب ورا ضلك
تتخبئ من حد
واقف على ناصية
رصيفها متاهة
تتربص على دفتر لحساب السنين
لما تتجمد وجوه الصحاب
ينكسر عودك
مايعدش يعزف على وترك
سوى حزن الغريب
تلمح فوق صمت الشوارع
يتمك
تقرأ في العناوين
إعلان باوجاعك
لمازحام الناس
يدوس على وحدتك
ياخدك من وسط نفسك
يوحشني صوت الناي
احس اني محتاجك
في الركن البعيد
لي انا صورة
تسمح نعيد اللقطة
اضحك
ضمني
قرب
الصورة بالأبيض وإسود بعدها متعلقة جوايا
ملامح بعيدة لطفلين واقف أنا جواك وانت ع الكرسي الخشب لابس ضحكتك في الصورة كنت أقرب وأنت بتمارس غيابك تسمح نعيد اللقطة ظبط مشاعرك الصورة بعدها تطلع نفس الوجوه لما تجرها الذكريات وتكب تجاعيد الوجع الصورة بعدها تطلع إضحك وشوف الصورة أصبحت ألوان
ليست هناك تعليقات:
إرسال تعليق