وكان ياما كان ، يحلى لو يجرحنا الكلام يعلا جوايا الغنى ويدوب في الغياب حسي كنت أنا فارد ف الفضا روحي أرسم على وش السما صورة صبية ضحكتها باب للصبح حزنها جسر حد المغربية حاجات صغيرة جوايا متبعترة كان ياما كان يحلى لو يجرحنا الكلام كنت انا موال غريب داير على بيوتنا أرسم وأكتب وأشطب تاريخ بلد أرجعلها صوت الغناوي على جدران بيوتها حكايات غرامي مرشوش في شوارعها على صوت حليم أرسم على حيطان البيوت ضحكتي مرة فاشل مرة ضايع واذامصاطب المربعة أكترها حنية أكون في أفضلها حال مغرور إذا مش صايع ويفرفر العمر فوق عتبة خالتي بلسم جارتنا ويمر كلامي من فوق ليل البيوت واطيش انا عقل و شعيرة ولما يفتحو بوابة الحكاية أكون على حصاني افتح مدن وبلاد بعيدة أشيل قلبي على كفي لعابر سبيل ماشي قدام حنفية بيتنا أضحك وانكت واشاغب وأعصب خلطة غريبة لو حضرتك مرسوم بالقلم والمسطرة لابد تكرهها واذا بطاقتك الشخصية لمجنون أحتمال تعشقها أنا الهارب من زمن تاني مالي الكون شعري وضحكي وصخبي ولعبي عند النخلات كتير باكتب وأكتر أنا بهرب مانته عارفها الارض اللي زرعتها بقصصي اللي كتمت ف قلبها شقاوة صحابي حضوري وغيابي مانته عارفها اللي طلعت بعدها أشجار حنضل هاتفضل طول العمر واقفة على باب بيتنا أه ياعلي حد ف الدنيا ناوي يلغي أسمي يشيل حسي اوعي ياولد أبوك ساعات يبالغ حبتين مانته عارف طبعي تناتيش مهملات لمسطول بشكل شخصي وكان ياما كان لما رصاصة طايشة نشنت على عمري
كتبت على سطر وسابت سطر
معرفتش اذا اللي انجرح قلبي
ولا قلب الطير لما ساب عشي
يامر الحصاد لما تزرع في ارض غيرك وتكون عبيط أهبل سايب مشاعرك قدام عنيك تتبهدل عارف ياصاحبي لحظة ماعزفت الرصاصة على وتري
قلت كأن اللحن دا عرفتو أصل دا صوتك
أه ياعلي على عمري
أه لما ساعات الدم مايحصلش الحبر اللي أنكتب بيه
ويكون للي عمره ما أشترى يتفرج وكان ياما كان
كنت انا فارد ف الفضا روحي
بكلمك يا علي باقصدك يا علي اه ياعلي بين الصغير فيكم والكبيرجرحي موال وسارح على وشه زي المتاهة اللي من شعر راسي لضفري ياترى مين فيكم ياعلي شايل للجبانة صورتي وحدك ياعلي جايلك ووحدك أو وحدي إذا في الدنيا انا سبتك
ليست هناك تعليقات:
إرسال تعليق